An Chenon Jane Kneebone a skrif:
Pur yntanys on ni dhe warnya Mike O’Connor re skrifas settyans ilow nowydh rag an Oferen yn Kernewek. Kyns lemmyn, mar dha del yllir dysmygi, nyns esa settyans a’n Oferen kowal, kyns oll settyans a alsa pub den oll y gana. An settyans ma, henwys ‘Oferen an Dasserghyans’ yw Oferen rag an werin, es y gana, ha selys war donyow kanow an werin kernewek. An hanow a stir ha dasserghyans Krist ha dasserghyans agan yeth. Ha pur deg yw, ynwedh, dell dybav vy.
An Oferen a vydh lonchys yn Penneglos Truru dy’Mergher an 3a a vis Metheven dhe 5.30 wh, y’n Oferen war Nos Gool S Petrok, ledys gans Keur an Eglos, mes ni a wayt pub den y’n kuntelles a wra kana ynwedh! Ytho, y fydh an servis yn kowal yn Kernewek. Gweyth pur bosek yw, rag an Eglos yn Kernow ha rag an yeth kernewek hy honan kekeffrys.
Ynwedh y fydh praktis a’n ilow gorthugherweyth an jydh kyns an Oferen, h.y. dy’Meurth an 2a a vis Metheven, yn Eglos S Mighal, Tewynn Blustri, dhe 7 wh, rag tus a garsa y dhyski kyns an jydh y honan.
Dewgh, ytho, ha kemerewgh agas rann y’n gweyth ma yw mar yntanus ha posek rag Kernewek. Ha derivewgh e dhe bub den oll a aswonewgh!