Gorseth Kernow - Pensans 2007

Areth gans an Barth Mur

Myras orth an banerow owrek ha du

A Dhen wordhy an Mer, Ostysy Enorys, Kesvyrth,

Gorseth Kernow a aswon mur ras dhe Bensans a’n dynargh hedhyu, ha rag oll an gweres re dhegemersyn ny dhe synsy an wharfos-ma. Gonesegeth Kernow yu fest sowen yn randyr-ma, a’n artys ha sportys bys yn golyow ha solempnytas. Gwreugh merkya, mar plek, a dus dhe barth howldrevel an Tamer!

Mur a dus a-vry a’s tevo aga gwryth omma, re dhe gampolla yn gwyryoneth, ytho my re dhewysys nebes anedha. Res porres dhym dalleth gans Syrra Humphry Davy – Steren Pensans. Ass ova den mur y awen! Kyn nag ova flogh a dylu rych, ef a gowlwruk mur. Yth eth ha bos scyensyth, Penrewler an Gowethas Ryal, ha fundyer a Gowethas Scyens an Mylas. Dres henna, barth ha devysour ova.

Wella Colenso, ken map a Bensans o losower a-vry nep eth dhe Vordyr Noweth avel Cannas Eglos. Ef, Kernow, a drelyas an Testament Noweth dhe yeth an Maoris. Mar pe an keth dra gwres rag an Yeth Kernewek y’n whetegves cansbledhen, pyu a wor an pyth a wharva? Drefen bos an Lyver Pysadow ha’n Bybel trelyes dhe Sawsnek hepken, spedys o dyfygyans a Gernewek.

Deu vap – ytho, lemmyn Myrgh! Marya Branwell a ve genys omma. Mam an tylu Bronte ohy. Bewgrafow a Charlotte, Emily hag Anne a lever hy bos Kernowes, hag yma y’n scryforyon a-vry na hy genynnow.

An re-ma yu dus a wruk aga merk war ystory. Enorys yns y gans Gorseth Kernow, mes ynweth oll an re usy ow servya Kernow ha’gan gonesegeth bewek. Y’n tor-ma, mayth us tus na-bell a vyn magly agan gonesegeth yn kemysk dyhanow an Soth-West, fest dhe les yu ragon dhe scodhya hag omlowenhe agan yeth, agan ylow, agan dons, agan sportys ha’gan gwary.

Vanessa Beeman, Barth Mur, Lowarthow Penlee 1.9.07

Myras orth an banerow owrek ha du

Return to 'Welcome - News' page
Dewhel dhe folen 'Dynargh'