Gorseth Kembry - 2006

Hevleny y fu an Esethvos Kenethlek Kembry, hag ynny an Orseth, synsys ogas dhe Abertawe, dhe le o y’n kensa, an Gwythvaow Dur Felindre. An safle o es lowr dhe gafos, ow pos a-dro dhe hanter myldyr dhe’n gogleth an M4, a-dal dhe Junnyans 46. Ostyans rag an cannasow Keltek o yn Penscol Abertawe, neb 25 mynysen yn car a’n Park Esethvos.

Del hevelly dhyn, yth esa ethom a vur a ober dhe Bark an Esethvos ha’n brassa parcow kerry yn ogas - heb dowt awos y vos hen wythvaow dur - drefen bos an safle dyen levenhes ha cudhys gans grow. Semlant an Park ytho o nebes mol, ha’n grow a greatyas mur a broblemmow gans comolow a bolter pup tro a wrug car lafurya dresto, ha mars esa tam gwyns, yth o dywwyth gweth. Yth esa mur a groffolans er y byn, kens oll y’n gwask ha der an PW. Yn whyr, wosa spena owr po dyw ow travaylya adro dhe’n Park, agan deudros ha ’skyjyow o fest plosek. Erbyn De’Merth taclow re dhothfya mar dhrok der an polter, yth esa ethom cafos tanker dhe styfya an trulerghow dywwyth an jeth.

Ny eth dy De’Sadorn an 5es a vys Est dhe gafos agan toknys h.e., ha De’Sul ny a vyras adro dhe’n Park. yn un omvetya gans mur a dus na wrussen-ny gweles termyn hyr. Myttyn De’Sul an Archepscop a Gergent, Dr. Rowan Williams, a bregothas y’n Tylda Mur hag awosa a dheth y’n Stevel an Consel, le may teth ef er ow fyn dhe gesclappya tam. Ef o pys da leverel bos y dhasscryf an ‘Testament Noweth’ res dhodho hag ef yn Kernow warleny ,war y estyllen lyfrow, kyn na yl ef convedhes mur a’n Kernewek! Ef a leverys del vya-ef ow tos dhe Gernow dhe ben a vys Gwyngala, ha pan wrugevy profya dhodho an tybyans dos tam avarra may halsa-ef dos dh’agan Gorseth, ef a leverys y fya hemma neppyth a garsa-ef gul, ha martesen y’n vledhen po dyw a dhe, ef a alsa restra neppyth.

Myttynwyth de’Lun yth esa cuntellyans an Orseth y’n kelgh drehevys yn arbennek war an Park, ha kynth o tam gwynsak, yth o solempnyta da. Byrth, Drewydhyon hag Ovydhyon noweth a vu degemerys y’n Orseth, y’ga mysk Iris Williams an ganores Kembrek. Y’n dohajeth y fu synsys y’n Tylda Mur ken cuntellyans an Orseth, le may fu pup cannas dyworth an gwlasow Keltek dynerghys gans an Archdrewyth ha le may wharfe Solempnyta an Gurun. Hevleny hemma a vu gwaynyes gans an drewydhes Eigra Lewis Roberts, neb o onen an cannasow Kembrek a dheth dhe Gernow rag an Orseth 2000 dhe Aberfal.

Mam o'r fro

De’Merth o deth ryth ragon-ny, hag ytho ny a spenas an jorna gans cowetha war an Park, warbarth gans prena lyfrow ha rohow.

De’Mergher a’gan gwelas y’n Tylda Mur arta, gwyskys y’gan powsyow an Orseth, an dro-ma rag ryans an medal rag Yeth Plen. Hem o gwaynyes gans benen yowynk - Fflur Davydd.

De’Gwener o deth arta rag deu solempnyta an Orseth - onen y’n myttynwyth y’n Kelgh war an Park, ha’n nessa y’n dohajeth y’n Tylda Mur, le may wharfe ‘Caderya an Barth’. Hevleny y fu hemma gwaynyes gans Gwynfor ap Ifor.

Seythen pur dha o ha pys da en-ny dhe omvetya unwyth arta gans kemmys ha cowetha coth arta. Y’n vledhen a dhe y fu leverys dhyn-ny y fyth an Esethvos yn Syr Flynt, ha’n vledhen awosa yn Kerdydh.

Tewennow

Return to 'Welcome - News' page
Dewhel dhe folen 'Dynargh'