Areth Bardh Meur Gorsedh Igor Porthia 2010
A Vestres Mer, a westyon enorys, kesverdh, tus Porthia, pobol Kernow, keskeltyon a dhiworth Alba, Iwerdhon, Ynys Manow, Kembra ha Breten Vyghan, havisi hag agan kentrevogyon dhiworth lann aral an avon yn Pow Sows, ha tus a dhiworth pub bro oll, dynnargh dh’agan solempnita, dhe Orsedh Kernow a wra golya ha’gan gonisogeth ha’gan yeth ha honensis Kernewek ni.
Berdh Gorsedh Kernow lowen yw dhe dhos omma yn Porthia yw onan an tegennow agan bro ger ni Kernow. Yma istori ha brav hag ynwedh pur hir ha dhe les dhe’n dre ma adhia’n jydh pan dheuth Ia omma dhiworth ynys las ha war’n oon las bys ha’n dre las ma rag dalleth hi soodh omma yn unn defendya an bobel erbyn turans a drigas war lann aral Plegmor Porthia. Dhe vos omma avel Bardh Meur, ragov vy tra boos yw drefen ow bos genys, ha megys, ha drehevys omma yn le ma.
An le ma yw dhe les dhe’n Orsedh drefen bos dalleth omma Dasserghyans Arnowyth Kernow. Nans yw deg ha peswar ugans bledhen Gwas Myghal ha Mordon re grias an kynsa skorenn Kowethas Kernow Goth omma rag kuntel an brewyon agan gonisogeth keltek na vo kellys travydh. Hag adhia’n jydh na re bia argerdh hag uskis ha sad rag an movyans ni hag yn mil naw kans eth warn ugens Pedrog, Arghderwydh Kembra a wrug dalleth Gorsedh Kernow dhe Voskawen Oon ha Gwas Myghal an kynsa Bardh Meur, Mordon y Gannas ha wosa ena istori yw.
Y fynnen ni grassa yn feur Eseli oll Kowethasow Kernow Goth rag an blydhenyow hag ynna ni a wrug kesoberi warbarth rag Kernow ha rag agan honensis hag ombosva. Yth esa yn sur an gwir erbyn an bys. Lowen on ni ynwedh dhe dhynnerhi yn dann an howl, lagas an jydh, agan kowetha ger a’n Orsedh Kembra ha’n Orsedh Breten Vyhan. Hebdha ha heb aga brederedh ha skoodhya na via gallos agan movyans dhe seweni y’gan ober ni bys hag hedhyw.
Pes da ov vy ynwedh bos omma hag Epskop Truru ha Tas Gough dhe dherivas dhedha a wra pesya yn ta agan ober hir dhe dreylya an Testament Koth yn Kernewek ha ni a wra mires yn rag y worfenna.
Pes pur dha ynwedh gans an hwel re wrug Konsel Kernow, yn arbennik adro dh’arwodha y’gan taves ni, hag rag aga ober yn skolyow rag hi tyski. An dhew anedha gans Maga. Pur dha ynwedh yw agan kesoberen avel keskowethyans gonisogethek ha dres puptra dres ober Bewnans Kernow, restrians glawlen gans tri ugens eseli ynno. Lemmyn yma godros treghyans mona hag y fydh strothyans ow mones ganso. Yma govenek dhynni dhe besya agan keskowethyans genowgh hwi ha ni a with agan kador dhe’n voos.
Yma ynwedh godros aral ragon ni ol, godros dh’agan leunder tiredhel. Godros ynkleudhyes yn profyans an kesgovernans adro dasfurvyans etholans. Mara pe dowt vydh adro styr Onan hag Ol y tal dhynni ol y enebi warbarth ow leverel. "Re bia Dowr Tamar agan ordir adreus moy es mil blydhen, Ordir gonisogethek yw, hag ordir yethek yw, aswonnys del yw gans Ewrop. Dowr Tamar yw agan ordir kenedhlek."
Na wrewgh tava agan ordir! Gesewgh Kernow dhe vos Kernow! Kernow Bys Vykken!
Skogynn Pryv, Mick Paynter
|
