Gourseiz Breiz - 2009

Dy’Sul an 12ves a vis Gortheren a welas an Orsedh Vretenok, ha rag hemma ow gwreg, Myrgh Casnewydd ha my eth avel kannasow a-barth an Orsedh Kernow.

An Orsedh a veu synsys yn park an davern byhan henwys ‘Cleusyow’, - neb tri hylometer dhyworth Arzano - hanow an pyth a brederav vy bos ‘kleysyow’ yn Kernewek. Y havalsa bos an tavern y’n kynsa chi tiek, mes lemmyn treylys dhe gemeres havysi ha - del hwarva Dy’Sul an Orsedh - tus teythyek dhe solempnya demedhyansow h.e.

Kyn feu an Orsedh synsys dhe Cleusyow, ni a ostyas dres an peswar dydh esa ni yn Breten Vyhan yn tre henwys Pont Aven, neb 20 mildir po a-dro dhodho a Arzano. An dre ma yw onen pur deg, gans poblans a a-dro dhe vil po pymthek kans person. Yth yw kresen lymnans hag ogas ha pub nessa gwerthji yn stretys an dre yw neb mirji po chi hwel lymner.

An dre hy honen yw drehevys a-dro dhe’n avon Aven, hag yw ynwedh onen teg, gans kay war amal an dre, ha pella govergoles, yma kosow tew dhe bub tu, hag a ros an chons dhe dus kavos kerdhow splann ha skewys dres lies mildir bys y’n arvor.

Solempnyta an Orsedh a sywyas ogas dhe’n keth patron es del wra pub bledhen. Pub bardh a wiskes y’ga gon y’n tavern, ha wosa nebes danvonadow kot, ni oll a geskerdhas dhe bark an Orsedh, kynsa neb 500 lath a-hys fordh tarmak, hag ena war fordh las an bargen tir.

Kylgh an Orsedh a veu desedhys yn park bras lowr, an kylgh merkys gans meyn a wrowan. Ni a geskerdhas yn ewn dhodho, ha gans an verdh owth omsevel a-dro dhe’n kylgh a veyn, Drewyth Meur an Orsedh Vreten Vyhan ha’n kannasow dhyworth Kernow ha Kembra eth dhe gres an kylgh, may feu desedhys an men omborth.

Del yw usys y’n solempnyta - avel y’n gorsedhow a Gernow ha Kembra, an Drewyth Meur a dhynnarhas an kannasow dhiworth Kernow ha Kembra, neb, y’ga thro, a dhros dhodho ev ha’n dus a Vreten Vyhan, gorhemmynow a’ga broyow aga honen. An dro ma, onen an kannasow a Gembra a redyas bardhonieth yn enor a Thomas Payne, gerys da rag y lyver ‘The Rights of Man’, ha neb a verwis nans yw 200 bledhen poran.

Hevlyna, nyns era marnas unn bardh - po yn hwir, ovydhes o hi - degemerys y’n Orsedh. Hi a veu degemerys avel ‘Arlodhes an Gonyow’, sooth nag esa bythkweyth kyns y’n Orsedh Vreten Vyhan. Dhe worfenna an solempnyta, ha kyns bos ‘Bro Goth Agan Tasow’ kenys, o kevrannans a uhelvar dhe bub huni war an park, avel arwodh a yehes ha yowynkneth. An uhelvar a veu kevrynnys y’n kynsa dhe bub bardh y’n kylgh, hag ena an remenant a veu res dhe eseli an poblek esa y’n park rag an solempnyta.

Mes an dra a wren ni perthi yn kov a’n bennseythen dres oll o helder meur dres ehen a’gan ostysi.

Kynth eus dynnargh krev res dhyn ni pub tro a wren ni mos dhe Vreten Vyhan rag aga Gorsedh, ny wrussyn ni bythkweyth kavos onen mar dha na mar dobm es hedna a wrussyn ni degemeres an tro ma.

Pennseythen ha Gorsedh a wra triga y’gan kovyon termyn hir.

Gourseiz Breiz - 2009

Tewennow

Return to 'Welcome - News' page
Dewhel dhe folen 'Dynargh'